Meri talaash mujhe le chali hai maazi mei’n
Tumhi batao mai’n khud ko kaha’n talaash karu’n?
Pighal pighal ke sada imtiha’n ki aatish mei’n
Wujood dhal gaya mera ajeeb saanche mei’n
Wo ik wujood jo rishto’n mei’n kho gaya hai kahi’n
Usi wujood ko phir se kaha’n talaash karu’n?
Taraashna hai naya ik mujassma yaa’n phir?
Mai’n apne gumshuda hisso’n ko phir talaash karu’n?
Tumhi’n batao mai’n khud ko kaha’n talaash karu’n?
Sawaal ye hai k tum se hee kyon mukhatib hoo’n?
Chalo batau’n tumhe’n, tum se kyo’n sawaal kya
Tumhi pe aa ke ruka tha mohobbato’n ka safar
Tumhi ho aakhri pehchaan mere hone ki
To kyo’n na tum se shuru ho ye wapsi ka safar?
Tumare pyar ke badle jo pyar tumko diya
Meri wafayo’n ne jo ikhtiyar tumko diya
Wo ikhtiyar jo tumne qafas mein dhal diya
Usi qafas se rihayi hai ibtida meri
Tumhare naam kiya tha jo umr ka hissa
Ye iltija hai meri aaj mujhko lauta do
Bara kathin hai meri jaa’n ye wapsi ka safar
Rihayi de k mujhe aaj mujh se milwa do!