Hijrat-e-Nabvi - Anus Younus

Hijrat-e-Nabvi Lyrics

Idhar makkay mein dunya tang thi imaandaaron per,
k ronday jaa rahay thy phool kesay jism khaaron per,
Nabuwat nay ijazat di k Yasrab mein chalay jao,
watan walon k is zulm o ta'addi say amaan pao,
basharat hai wahan per aman bakshay ga Khuda tumko,
yahan subh e watan hai khanda e dandaan-numaa tumko,
Sahaba per agarchy qehar k baadal barastay thy,
becharay saans aazadi say lenay ko tarastay thy,
naa tha aasan mun apnay watan say morr ker jana,
Rasool e Paak ko makkay mein tanha chhor ker jana,
magar farman e Mehboob e Khuda, farman e Baari tha,
musalmano ka sheva, sheva e itaa'at guzaari tha,

Sahaba rafta rafta jaanib e yasrab huye raahi,
qureshi kaafiron ko mil gayi filfor aagahi,
dilon mein khush huye zaalim k ab hasrat huyi poori,
Muhammad or us k saathion mein ho gayi doori,
Musalman jaa chukay arz e habash mein or yasrab mein,
yeh acha waqat hai sab tal gaye waqt e munasib mein,
Abu Bakar o Ali baaqi hain lekin 2 ki hasti kya,
bahadur hi sahi hum per karen gy pesh dasti kya,
jo chand afraad hain woh sab k sab kamzor hain saaray,
k ab bhi chuptay phirtay hain hamaray khof k maaray,
yeh acha waqat hai ab qatal ker daalo Muhammad ko,
mitaa do aaj tanhayi mein is Noor e Mujarrad ko,
Tasahul ab nahi acha k toofan charhtay jaatay hain
Habash mein or yasrab mein Musalman barhtay jatay hain,
Khuda walay kahen aisaa naa ho quwwat pakar jayen,
Butaan e Ka'aba k is mulk say jhanday ukhad jayen,
Jabeer o uqba o utbaa abu jahal o abu sufiyan,
Nazar abu najtari haris umayya or ek shaitaan,
yeh sab aiwan e nadwaa mein ikathay ho gaye aa ker,
qabaail k numainday bithaye sath bulwa ker,
tha shaitaan najad k ek behaya boorhay ki soorat mein,
k chal ker door say aaya tha aaj is bazm e laanat mein,
huye aiwan k darr band, taqreerain lagi honay,
Nabi ko qatal ker denay ki tadbeerain lagi honay,
nazar aati thi is boorhay ko her tajweez mein khaami
woh kehta tha mubaada pesh aaye koi naakami,
bilakhir soch ker abu jahal nay ek baat batlayi,
yehi tajweez is shaitaan boorhay ko pasand aayi,
kaha us nay k her kunbay say ek ek aadmi chun lo,
koi baaqi naa reh jaye qabila yeh zara sun lo,
yeh niklen aaj shab ko lay k khoon aasham talwarain,
Muhammad per yeh talwarain sabhi yakbaar hi maaren,
gharaz tay paa gayi aakhir yehi tajweez shaitaan nay,
qasam kha kha k logon nay Nabi ke qatal ki thaani,
Safina mohar ka jis dum shafaq k khoon mein dooba,
kiya taarkion nay din pe chaa janay ka mansooba,
kayi fitnay jaga ker raat nay phela diye daaman,
fiza per lashkar e zulmaat nay phela diye daaman,
musallat ho gayi khamoshiyan dunya e hasti per,
sitaron ki nigaahen jam gayen makkay ki basti per,
nazar aati ho jis mein roshni woh aik hi ghar tha,
Musallay per wahan jo shakhs betha tha Payambar tha,
Ibaadat khatam ki taskeen o itmenaan say us nay
utha bandhi kamar ALLAH ke farmaan say us nay,
jagaya neend say Sher e Khuda ko or farmaya,
ke famraan hijrat e yasrab ka hai mere liye aaya,
misaal e musa o dawood hijrat farz hai mujh per,
Kamal e deen e haq, itmaam e hujjat farz hai mujh per,
utho, dekho ke talwaaron say ghar mehsoor hai mera,
ke meri qoam ko ab qatal hi manzoor hai mera,
nikalna or is aalam mein talwaaron pe chalna hai,
magar hukm e Khuda hai is liye mujh ko nikalna hai,
yeh chaadar orh lo, so jao aa ker mere bister per,
muhaafiz hai wohi rakho bharosa shan e daawar per,
yeh maal o zar inhen logon ka mere paas amanat hai,
amanat ka adaa karna hi islami diyanat hai,
Khuda hafiz hai dekho dil mein andesha naa kuch lana,
yeh cheezain un ki pohancha ker soo e yasrab chalay aana,
Ali nay hukm ki tameel ki or orh li chaadar,
Ba'itmenaan aa ker so gaye Hazrat k bister per,
iraada ker liya jab Sarwar e Aalam nay chalnay ka,
to dekha raasta masdood hai ghar say nikalnay ka,
Draazon mein say jhaanka her taraf gehra andhera tha,
magar pehray kharray thy ghar ko jalladon nay ghera tha,
andhere mein chamak uthti thi bijli ki tarah dhaaren,
nazar aaya ke hain her simt talwarain hi talwarain,
yeh aadhi raat ka aalam yeh haibat-naak nazzara,
magar darta na tha baatil say woh ALLAH ka pyara,
woh dohrata hua wahdat ka dum bharta hua nikla,
tilaawat surah e yaseen ki karta hua nikla,
giri barq e nazar is majma e qaatil ki aankhon per,
k patti khergi ki bandh gayi baatil ki aankhon per,
khinchi hi reh gayen khoon-rez khoon aasham shamshiren,
kisi nay khench di hon jis tarah kaghaz ki tasverain,
Khuda nay khaak e ghaflat daal di kuffar ke sar mein,
Rasool e Paak pohanchay Hazrat e Siddique ke ghar mein,
sunaya dost ko farmaan e haq yasrab ki hijrat ka,
Nabi nay zindagi bakhshi, diya mazza rafaqat ka,
Ba'ujlat dukhtar e Siddique nay saaman ko baandha,
Nitaaq apni utari or us se tosha daan ko baandha,
Habib e Haq ki khushnoodi silaa tha josh e khidmat ka,
sharaf paaya huyen zaat un nataaqe aaj say Asma,
Huye aazad baatil ke hisaar e qehar say dono,
abhi kuch raat baaqi thi ke niklay shehar say dono,
Nabi nay Khana e Ka'ba ko dekha or farmaya,
ke ay pyar e haram meri teri furqat ka waqt aaya,
tere farzand ab mujh ko yahan rehnay nahi detay,
teri paakeezgi ka wa'az tak kehnay nahi detay,
judayi aarzi hai phir bhi dil ko beqarari hai,
ke tu or teri khidmat mujh ko dunya bhar say pyari hai,
yeh farmata hua aagay barha Islam ka Haadi,
sarasar moam ho ker reh gayi yeh sangdil waadi,
charhayi sakht thi sangeen o na'hamwaar rasta tha,
Nokilay pathron ka farsh tha, purkhaar rasta tha,
Nabi ke paaye nazuk her qadam per chott khatay thy,
Dil e Siddique ke jazbaat zakhmi hotay jatay thy,
Naa dekha jaa saka paaye Muhammad ki jarahat ko,
Basad israar kandhon per uthaya shan e rahmat ko,
andhera patharon ke dhair ko hai tor ki ghati,
Khuda hi jaanta hai yeh musibat jis tarah kaati,
Bilakhir 2 musafir nizd e ghaar e saor aa thehray,
Muqaddar tha yehi noorani o khakaan pe laa thehray,
gaye andar abu bakar or usko saaf ker aaye,
Ubaa ko chaak ker k rozanoo mein us ke bhar aaye,
Mah o Khursheed nay burj e safar mein istirahat ki,
ke tha noroz tareekh e yaqum thi sanne hijrat ki,
azal say so rahi thi khaak ki touqeer jaag uthi,
yakayak is andhere ghaar ki taqdeer jaag uthi,
haqeeqat khul gayi jis waqt ghaafil hosh mein aaye,
bohat bhipray, bohat hi uchlay kooday josh mein aaye,
bohat kuch khencha taani ki, Ali ko khoob dhamkaya,
yahan say phir yeh majmaa khana e siddique per aaya,
hua maloom unhen abu bakar bhi ghar mein nahi soye,
yeh aisi baat thi jis nay hawaas o hosh bhi khoye,
baham larrnay lagay ek dusray ki daadhiyan noochein,
Muhammad ko pakar lenay ki tarkeebain kayi sochein,
kiyaa ailaan aakhir jo koi jurrat dikhaye ga,
pakar laaye ga to inaam mein 100 oonth paaye ga,
lagay kuch jamma ho ker shehar hi mein ha-wa-hoo karnay,
bohat saaray musallam ho ke niklay justaju karnay,
Ta'aaqub mein kayi mushrik dahan e ghaar tak pohanchay,
kayi baar is maqam e Sayyad e Abraar tak pohanchay,
suni Abu Bakar nay qadmon ki aahat, dil hua purgham,
kaha dushman qareeb aaye hain ay Fakhar e Bani Aadam
kaha ALLAH saathi hai to kya andesha e dushman
rakh اِنَّ اللّٰہَ مَعَنَا per nazar ay dost لَا تَحْزَن
utha rakhi naa ahl e makka nay baaqi koi kasar,
nahi pohancha Khuda k Paak bnadon tak magar koi,
musafir teen roz o shab rahay is ghaar k andar,
ghizaa milti rahi taaza bafazl e Khaaliq e Akbar,
sukoon rafshaan hua dunya pe chothi raat ka saaya,
to aamir gher say ek naaqa ki jodi sath lay aaya,
adab say arz ki Abu Bakar nay ay Rehmat e Baarein,
sawar e naaqa ho ker kejiye chalne ki tayyari,
hua irshaad is naaqa ki qeemat tay karo pehle,
ke hum qeemat baghair isko naa lain gy soch lo pehle,
ishara tha madad juz rehmat e yazdan nahi letay,
Khuda ki raah mein insan ka ahsaan nahi letay,
Baqeemat lay ke naaqa Shan e Rehmat nay sawari ki,
Barhay yasrab ki janib nik'hat e baade bahari ki,
Rasoolullah or Siddique thy ek pusht naaqa per,
tha aamir doosri per or uskay sath ek rehbar,
bazahir chand ahl e kaarwan maloom hotay thy,
magar un ke jaloo mein 2 jahan maloom hotay thy,
yeh shab chaltay hi guzri or din ki dopehar aayi,
Arab ki dhoop nay shan e tamaazat apni dikhlayi,
kiyaa karti thi ghusl e aftaabi is liye waadi,
ke guzray ga yahan say aik din Islam ka Haadi,
kiya aaram ek pathar ke saaye mein risaalat nay,
muhayya ker liya doodh us jagah bhi josh e khidmat nay,
muqarrar ho chuka tha is tarah inaam oonthon ka,
giriftaari ki khatir bich chuka tha daam oonthon ka,
Suraqa ibn e maalik ki hawas nay aaj uksaya,
charha ghoray ke ooper or Nabi ko dhoondnay aaya,
magar chaltay hi thokar li sabaq raftaar ghoray nay,
jagaya rooh e khuwabida ko pehli baar ghoray nay,
yeh ek tanbih bhi lekin samjah isko nahi aayi,
ke baad az ta'ammul phir ta'aaqub hi ki thehrayi,
nazar aaya ussay ab qaafila imaan walon ka,
hawas nay bhar diya 100 oonth say daaman khayalon ka,
Suraqa khush hua ghoray ko dhorrata hua dhorra,
nihayat zaym say nezay ko chamkata hua dhorra,
giraaya ek jagah baar e digar raakib ko markab nay,
jhanjhora rooh e khuwabida ko dast e qudrat e Rab nay,
yeh ghebi taaziana tha, yeh tanbih e ilaahi thi,
hua saabit ke faalon mein ta'aaqub ki munaayi thi,
phir uksaya ussay inaam milnay ki umeedon nay,
khitaab e qaatil e islam milnay ki umeedon nay,
barha phir charh ke ghoray per jahalat ke iyaday say,
ussi bereham niyyat say, ussi qaatil iraaday say,
magar is martaba daam e balaa mein phans gaya ghora,
riwayat hai ke raanon tak zameen mein dhans gaya ghora,
pukara Ya Muhammad bakhsh dejiye ga khataa meri,
main gumrahi mein tha beshak basi thi rahnuma meri
main taa'ib hoon mujhe ek aman ki tehreer mil jaye,
tere darbar e rehmat mein mujhe touqeer mil jaye,
anokhi iltijaa thi muskuraya qoam ka haadi,
phir usko be-ta'ammul aman ki tehreer likhwa di,
Suraqa say mukhatib ho ke yun Mulham nay farmaya,
agarchay tu abhi ALLAH per imaan nahi laaya,
Milaal e rang hai lekin Khuda ki shan walay hain,
tere hathon mein kangan dekhta hoon dast e kisraa ke,
tahayyur khez thy moujez numa alfaaz hazrat ke,
ayaan farma diye thy aap nay israar qismat ke,
jahan ko jalway is peshangoyi ke phir nazar aaye,
ke yeh kangan suraqa nay Umar ke ehad mein paaye,
Suraqa aman ki tehreer lay ke ghar ko loat aaya,
iyaada phir safar ka Rehmat e Aalam nay farmaya,
sitaray humsafar thy raat ko or din ko sooraj tha,
manazil mein lakafda multaja tha or murahhaj tha,
Hadayat or azakhir or rawahay raah mein aaye,
maqam aate jadajad bhi iqaamat gah mein aaye,
abhi yeh qaafila daamaan e manzil tak naa pohancha tha,
giraftaari ki khatir or aik amboh aa pohancha,
yeh 70 aadmi thy dasht hi gharbaar tha inka,
jawan himmat barida aslami sardaar tha unka,
issi inaam ki laalach inhen bhi khench laaya tha,
yeh fitnaa raastay mein ahl e makka nay uthaya tha,
magar Islam ki dolat likhi thi unki qismat mein,
barida aa gaya aatay gi daamaan e Nabuwat mein,
sharaf paaya jo is nutk e Khuda say hum-kalami ka,
tahayya ker liya sab nay Muhammad ki ghulami ka,
buton ko chhor ker dunya e baatil say juda ho ker,
chalay yasrab ki jaanib humrakab e Mustafa ho ker,
muhabbat mein barida nay utara apnaa ummama,
ussay nezay mein baandha or jhanda is tarah thaama,
k islami barera aaj lehraya fizaon mein,
مَعَنَا اللّٰہُ أَکْبَر ki sadaa goonji hawaon mein,
yeh jhanda aman o rahat ki basharat deta jata tha,
Tuloo e subh e wahdat ki shahadat deta jata tha,
ke adal o badl ka mukhtar, aman o sulh ka haami,
mujassam rehmat e aalam, Muhammad Mustafa naami,
Woh abr e lutf jis pe her gul e gulzaar khandan hai,
anees e bekasan e dard mand e dard e mandan hai,
jahan ko azsar e no noor say mamoor karne ko,
dilon say kufar ka zang e kadoorat door karnay ko,
woh jis ka ek ishara rooh e murdaa ko jilata hai,
wohi tashreef lata hai, wohi tashreef lata hai,
nikal ker shehar say khalqat qubaa tak chal ke aati thi,
tamanna rang e hasrat ban ke aankhon mein samati thi,
kayi din tak naa jab soorat dikhayi Shah e Waala nay,
bohat muz'tarr huye shamm e nabuwat ke yeh parwanay,
kisi nay di khabar yeh lo Rasoolullah aa pohaychay,
janab e hazrat e Siddique bhi ham-raah aa pohanchay,
ikhathy ho gaye her simt say taalib ziyaarat ke,
shuaaon ki tarah say gird khursheed e risaalat ke,
nazar aayi junhi pehli jhalak rou e munawar ki,
salaami goonj uthi naar e ALLAH o Akbar ki,
Payambar nay qubaa mein chand din aaram farmaya,
murawwat nay ba'lutf e khaas, faiz e aam farmaya,
sabhi pehle muhajar is jagah mojod thy saaray,
ikathy ho gaye thy chaand ke chaaron taraf taaray,
Ali e Murtaza bhi teesray hi roz aa pohanchay,
chalay makkay say tanha paa piyada taa qubaa pohanchay,
woh ahl e makka ko unki amanat day ke aaye thy,
unhen islam ka dars e diyaanat day ke aaye thy,
Asaas e deen e muhkam deen Nabi ki khaasray aali,
Qubaa mein sab say pehle aik masjid ki bana daali,
yeh masjid awwalein bunyaad thi itaa'at guzari ki,
Safa ki sidq ki taqwa ki or parhezgaari ki,
uthi ek roz aawazain buland ALLAH o Akbar ki,
sawaari jaanib e yasrab chali mehboob daawar ki,
Namaz e Jumma ka waqt e mubarak raah mein aaya,
yahan Hazrat nay khutba jumma ka irshaad farmaya,
yeh pehla jumma tha parh li namaz e jumma Hazrat nay,
Imaamul Mursaleen ki iqtidaa ki aaj ummat nay,
hua chaaron taraf aqzaa e aalam mein pukaar aayi,
bahaar aayi bahaar aayi, bahaar aayi bahaar aayi,
junoobi simt utha aik noorani ghubaar aakhir,
sawaaz e shehar mein daakhil hua naaqa sawaar aakhir,
fiza mein bas gayen touheed ki aazad takbeerain,
yeh takbeerain thi baatil k galon per taiz shamshiren,
muhajir peechay peechay chal rahay thy sar-ba-kaf ho ker,
kharray thy raah mein ansaar her soo saf-ba-saf ho ker,
dar o deewaar us taaza huye tazeem ki khatir,
zameen kya aasman bhi jhuk gaye tasleem ki khatir,
Muslaman beebian ghar ki chatton per jamma ho ho ker,
nazar say choomti thi ismat e daamaan e peghambar,
Zubaan per أَشْرَقَ الْبَدْرُ عَلَیْنَا ki sadaain thi,
Dilon mein maa'adaa lillah ki hi bas duain thi,
kahen masoom nanni bachiyan thi daff bajatien thi,
Rasool e Paak ki jaanib isharay ker ke gaatein thi,
ke hum hain bachiyan najjar ke aali gharanay ki,
khushi hai Aamna ke laal ke tashreef lanay ki,
Musalmanon ke bachay bachiyan masroor thy saaray,
gali koochay Khuda ki hamd say maamoor thy saaray,
Nabuwat ki sawari jis taraf say ho ke jaati thi,
Darood o Naat ke naghmaat ki aawaz aati thi,
Rasoolullah salam ansaar ka letay huye guzray,
zuban say khair o barkat ki dua detay huye guzray,
Abu Ayyub ke ghar mein Habib e Kibriyaa thehray,
magar jab ho gayi tayyaar masjid us mein aa thehray,
bhataktay phirnay walon ko Khuda ki raah per laaya,
Buton mein girnay walon ko darr e ALLAH per laaya,
yahan aatay thy ghairullah ka rishta torrnay walay,
Raza e aakhirat per hubb e dunya chhornay walay,
Musalman aik or zoh zoh or waraa ki zinda tasveerain,
Namazein or tasbihein, azaanein or takbeerain,
yeh basti kaat'ti thi waqt mein kis say bhalaayi say,
nihaayat aatashi say aman say sulh o safayi say,
Nabi ka hukam or Quran dastoorul amal unka,
sadaaqat ban gayi ay aaina zaahir or baatin ka,
Riyaa e haq say rashq e toor e seena ban gaya yasrab,
Nabi ka aasatan ban ker Madina ban gaya yasrab,
Riyaa e haq say rashq e toor e seena ban gaya yasrab,
Nabi ka aasatan ban ker Madina ban gaya yasrab...
Lyrics Submitted by Qaser Asghar