St. Louis Blues Lyrics

أنا شعري غامق بس قلبي مطقطق ابيض من زمان.
جايز عشان
الناس ساعات بتلاقي ناس
تعرف تشوفها بجد
وانا قلبي لسه
عمره ما اتكشف علي حد
بقابل قد ما بقابل
وأفارق قد ما بفارق
وما اتعلمش
بلخبط في الأسامي عشان
بخاف انسي
بلخبط في الحياة علشان
بخاف لا ما اعيشش
بقالي كتير ما بتكلمش
بخاف يبقي الكلام متعاد
ما كملتش ف أي رحيل
ما كملتش ف أي قعاد
وبدي للحياة بالكاد

ما يكفيها.
ويكفيني
شرور البهدلة فيها
مليش ف البنت طلبات غير
تنسيني اللي قبليها
وبدخل ف الحاجات تخاطيف
وعيني ع اللي بعديها
رقصت كتير علي السلم
بخاف اطلع
واخاف م الأرض
- أكيد الخوف مش الفكرة
وحتي يا ستي يعني بفرض
أكيد الخوف مهواش عيب
طبيعي الناس تخاف م الغيب
وم المقدور
برغم كده
بحب الضلمة أكتر ما. بحب النور
ساعات بتمني شقة
ف برج شايفة النيل
وأوقات إني اعيش مستور
وبزهد. كل ما ف الرحلة من زخرف
وما ازهدهاش
ما دام فيها رمق يتعاش
أكيد ف الرحلة يوم متحاش
ومستني أعدي عليه
- وتعرف عنه أصلا إيه؟
مفيش غير إنه لسه مجاش
بنام؟
طبعا. كتير جدا
وبالأيام
وطول الوقت بحلم إن انا بجري
وبشبع م الحاجات بدري
ورغم ده لسه ما شبعتش
من الجري ومن الأحلام
بخاف م الموت
عشان خايف ساعتها أكون
عبيط. كل اللي سبته. كلام
بشوف أفلام
عن الدنيا
وعن حكايات
لناس عاشت حاجات تانية
وعن حكايات لناس ماعاشوش
وبتأثر
وبتحسر
علي كل اللي كان ممكن
أكونه
بس ما بقيتهوش
ما سبتش شئ مجربتوش
ولا جربته وما سبتوش
بحب العود
واحب الناي
واموت واعرف حقيقي ازاي
حاجات من دي
ساعات بتدب فيها الروح
من اللمس و من الأنفاس
فتبقي حية أكتر. م البشر والناس
Song Discussions is protected by U.S. Patent 9401941. Other patents pending.